MRS. JANE PRITCHARD, ROME, ONEIDA COUNTY, NEW YORK.
Chwefror 8fed, yn nghymydogaeth Rome, o'r clefyd melyn, Mrs. Jane Pritchard, yn 53 mlwydd oed, priod Mr. William Pritchard, tyddynwr o'r lle hwnw.Ganwyd y trengedig yn ardal Capel Cerig, Sir Gaernarfon. Merch ydoedd i Moses a Jane Hughes, o'r ardal uchod. Ymunodd ag achos crefydd gyda'r T. C. pan oddeutu 32 mlwydd oed.
Dylem hysbysu i'r darllenydd ei bod yn fud a byddar, er hyny gwelodd yr Arglwydd yn dda yn ei ras, trwy ryw lwybr ddangos iddi ei bod yn bechadures, a bod ganddo drefn i'w hachub; ac felly rhoddes ei hun yn gyntaf i'r Arglwydd, ac yna i'w bobl ef. Priododd pan oddeutu 32 oed, a gellir dweyd am dani, er ei holl anfanteision, iddi fod yn ymgeledd gymwys i'w gŵr am 21 o flynyddoedd. Bu iddynt dri o blant - fel mam, mae y teimlad sydd gan y plant ar ei hol yn profi eu bod yn agos at ei meddwl, ac yn anwyl iawn. Yn y flwyddyn 1850, daethant drosodd i'r wlad hon, ac ymsefydlasant yn Frankfort Hill ar y cyntaf, a buont yno wyth mlynedd; wedi hyny daethant i ardal Rome, ac yma y gorphenodd hi ei gyrfa ddaearol.
Nid oedd amheuaeth yn meddwl neb a'í hadwaenai, nad oedd yn Gristion cywir; deuai i'r moddion yn ôl ei gallu, er nad oedd yn deall dim a ddywedid yno, ond er hyny byddai yn ystyried nad oedd yno "onid Tŷ i Dduw, a phorth i'r nefoedd." Mae rhywbeth yn fy nghymhell i roddi i lawr un awgrym o'i heiddo a wnaeth yn ddealladwy wrth ei mherch, pan ddaeth adref i ymweled â hi dridiau cyn iddi farw. Amlygai iddi, "pan fyddai yn cysgu y byddai rhyw un yn gafael yn ei llaw ac yn gofyn yn dyner iddi, a ddeuai hi gydag ef i fyny i ryw le; fod yno wlad hyfryd a dymunol, a bod pawb o'r trigolion yn hollol iach." Byddai yn cael y weledigaeth yma yn aml yn ei chystudd.
Daeth tyrfa luosog yn nghyd i hebrwng ei rhan farwol i fynwent Rome, pryd y gweinyddwyd ar yr achlysur gan y Parchn. Hugh Ẁilliams, Rome, a William Rowìands, Holland Patent.
JOHN H. PARRY