MRS. MARGARET ROBERTS GRIFFITHS, MIDDLE GRANVILLE, WASHINGTON CO, NEW YORK.
Yr 20fed o Ionawr diweddaf bu farw Mrs. Margaret Griffiths, priod Mr. Griffith Griffiths, Jamesville.Ei chartref cyntefig yn yr hen wlad oedd Pentrefelin, ger Tremadog, Caernarfon, Gogledd Cymru. Enwau ei rhieni oedd Griffith a Margaret Roberts.
Dechreuodd ddangos cariad at Iesu Grist ac ymwasgu â'i bobl pan yn lled ieuanc. Derbyniwyd hi i fwynhad o holl freintiau crefydd cyn bod yn llawn dair arddeg oed gan y Parch. R. Ellis, Rhoslan, yn Eglwys Annibynol Tabor. Gadawodd dŷ ei thad a gwynebodd ar y byd profedigaethus hwn yn ieuanc, fel y mae llawer o fercheg teg Cymru yn gwneud gan fyned i wasanaethu am gyflog. Yr oedd ei symudiadau o'r naill fan i'r llall yn fawrion, a rhyw ddigwyddiadau a chanlyniadau pwysig yn gysylltiedig a hwy. Y symudiad cyntaf oedd yn bwysig iawn iddi sef oddi cartref i Lanberis lle yr ymunodd mewn priodas â Mr. Griffith. Griífiths, Tyddyn Siarles.
Yn mhen ychydig flynyddoedd wedi hyny mudodd gyda'i theulu o Lanberis i Newfoundland. Yr oedd ei sefyllfa yno yn hynod anffafriol ac anfanteisiol iddi gael un math o gysur crefyddol, canys nid oedd yn deall iaith y wlad. Ond ni ddigalonodd ac ni wadodd y ffydd yn yr amgylchiad a'r cyfyngder hwnw - elai yn gyson i'r addoliad, a gwnai bob ymdrech i ddeall gweinidogaeth y Gair, nes o'r diwedd gorchfygodd yr holl anhawsterau fel y gallai fwynhau holl gysuron yr addoliad Seisonig. Ond pan oedd fel yna wedi dyfod i gyfeillach a'r frawdoliaeth hono ac i gydnabyddiaeth a'r gweinidog ac yn gallu ymddiddan a'r naill a'r llall o honynt am bethau crefydd, yr hyn oedd hyfrydwch ei henaid, dyna hi yn symud drachefn oddi yno i ogleddbarth Amcrica, sef ardaloedd y chwareli yn Middle Granville, New York, lle y daethum i yn gydnabyddus â hi, a hyny yn benaf trwy y cysylltiadau crefyddol.
Yr oedd ganddi barch calon at grefydd a chrefyddwyr, yr oedd yn ffyddlon a diwyd bob amser tra y daliodd ei hiechyd. Bu yn nychu ar fin yr Iorddonen am tua dwy flynedd fel un â chwant ymddatod a bod gyda Christ; ond yn ôl ei chyfaddefiad amryw droion yr oedd aros yn y cnawd yn well ganddi er mwyn ei phriod a'i phlant, canys dyna yn unig oedd yn clymu ei meddwl a'i serch at y byd hwn - o ran eî chyflwr personol ei hunan yr oedd yn dawel a chalonog, ie pan yn siarad am awr yr ymddatodiad gwnai hyny â sirioldeb yn chwareu ar ei gruddiau cystuddiol, fel un wedi cael boddlonrwydd y byddai marw yn elw mawr iddi, ac yr oedd yn ddigon eglur i bawb pan oedd y rhan ddaiarol yn gwaelu ac yn dadfeilio y ddydd i ddydd, fod y rhan ysbrydol yn cael ei adnewyddu ac yn myned gryfach gryfach o ddydd i ddydd.
Felly y terfynodd ei gyrfa yma gan adael y tystiolaethau mwyaf boddhaol i'w phriod, i'w phlant ac i'r eglwys yn Jamesville, na bu ei llafur yn ofer yn yr Arglwydd.
Claddwyd hi yn y modd arferol yn nghladdfa Middle Granville. Yr Arglwydd a ofalo am ei phriod gweddw ac am ei phlant amddifaid ac a roddo iddynt un ac oll gyffelyb grefydd yn eu bywyd a chyffelyb farwolaeth ddedwydd yn y diwedd.