MR. HUGH PUGH, NELSON, MADISON COUNTY, NEW YORK.
Ionawr 24ain, 1883, yn nhy ei fab yng nghyfraith, Mr. William Evans, yn West Eaton New York, Hugh Pugh, yn 65 mlwydd oed.Math o glefyd melyn, yr hwn a dorodd yn ddyfrglwyf ydoedd ei afiechyd.
Brodor o Lanegryn, Meirionydd, Gogledd Cymru ydoedd a daeth ef a'i briod oedranus i'r wlad hon o Liverpool tua 1834. Ar ôl bod am beth amser yn New York ac Utica, aeth i gartrefu i West Bangor Pennsylvania, lle yr oedd amryw o'i gydnabod a'i gydweithwyr. Dychwelodd eilwaith i Utica, ac yn y diwedd sefydlodd yn Nelson, Swydd Madison, New York, lle yr oedd ei ferch a'i fab Hugh yn aros.
Yr oedd yn foesgar a boneddigaidd yn ei gymdeithas - nid oedd "ymadrodd ffol a choeg ddigrifwch yn dyfod o'i enau." Bu yn aelod crefyddol yn eglwysi y Wesleyaid yn Meirionydd am 30 o flynyddau - 21 yn Abergynolwyn a 9 yn Arthog. Dywedir am y wenynen, ei bod yn dra gofalus rhag i'r mêl a'r cwyr lynu wrth ei chorff fel ag i'w rhwystro gyda'i gorchwyl. Felly yntau, ni roddodd lawer o'i fryd a'i serch ar bethau y byd hwn, rhag iddynt luddias iddo lafurio am y pethau ni dderfydd. Gellir dweyd ar ôl iddo fyned yr ochr arall i'r dwfr, iddo fyned a'r cwbl gydag ef, a'r pethau hyny yn llawer mwy sylweddol a pharhaol na phethau y ddaear hon.
Er iddo farw yn mhell o'i wlad enedigol, mae'n gorwedd yn ymyl lluaws o'i gydgenedl wrth gapel yr Annibynwyr yn Nelson.