MR. WILLIAM W. THOMAS, CAMBRIA, WISCONSIN.

Awst 23 1884, yn Cambria, Wisconsin, ar ôl amryw fisoedd o nychdod, bu farw yr hen bererin ffyddlon Mr. Williain W. Thomas, Bangor, Wisconsin, yn 75 mlwydd a 9 mis oed.

Aeth Mr. a Mrs. Thomas i Cambria yn mis Mehefin diweddaf, i ymweled a'u plant, a chyda y bwriad o fwynhau y Gymanfa oedd i gael ei chynal yn y lle hwnw; ond buan iawn ar ôl i'r Gymanfa fach ar y ddaear fyned heibio dechreuodd pabell bridd yr hen frawd Thomas ddwyn arwyddion amlwg ei fod yn prysur deithio tua'r Jerusalem nefol, i'r Gymanfa fawr a gynelir gan y rhai cyntaf anedig ar fynydd Seion, ac ar y dydd a nodwyd cyrhaeddodd ben y daith.

Dygwyd yr hyn oedd farwol o hono i Bangor, a daeth tyrfa fawr a pharchus yn nghyd i'w anfon i dŷ ei hir gartref, ac yn nghanol galar cyffredinol a hiraeth dwys, rhoddwyd ei gorph gwael i orwedd yn y bedd hyd yr adeg y bydd yn "rhaid i'r llygradwy hwn wisgo anllygredigaeth, ac i'r marwol hwn wisgo anfarwoldeb."

Cyflawnwyd y gwasanaeth angladdol gan y Parchn. Robert T. Roberts, H. M. Pugh, a John J. Vaughan.

Ganwyd Mr. Thomas yn mhlwyf Llangwnadl, Sir Gaernarfon, Gogledd Cymru. Ei rieni oeddynt Thomas a Laura Williams, Tyddyn-ffynon.

Ymunodd mewn priodas â Miss Anne Hughes, merch Hugh a Margaret Roberts, Tyddynffili, yn mhlwyf Llanor, a pharhaodd yr undeb yn un cysurus a dedwydd am dros 48 o flynyddau, a bu iddynt 10 o blant, ond yr oedd pedwar o honynt wedi rhagflaenu eu tad i'r byd tragywyddol, a gadawodd y gweddill mewn cylchoedd pwysig a sefyllfaoedd cysurus ar y ddaear, er wedi eu gwasgaru yn lled bell oddiwrth eu gilydd.

Mae Mr. Hugh W. Thomas a Mrs. Evan Lloyd yn Cambria, a Mrs. Edward S. Morris yn Milwaukee, Wisconsin; Mr. William W. Thomas yn Winona, a Mr. John Thomas yn Minneapolis, Minnesota; a Mr. Robert Thomas yn Blunt, Dakota.

Yn fuan ar ôl priodi aeth yr ymadawedig a'i briod i fyw i dy capel Cefnywaen, a thra yn aros yno daethant yn bersonol adnabyddus a llu mawr o weinidogion a phregethwyr y T. C, a mynych y soniai Mr. Thomas am yr amser dedwydd ac adeiladol a dreuliodd ef a'i briod yn nghymdeithas y prophwydi a'r gwyr enwog gynt.

Daeth y teulu i'r wlad hon tuag un mlynedd a deugain yn ôl, a sefydlasant am dair blynedd ar ddeg yn Nhalaeth New York, sef wyth mlynedd yn Remsen a phump yn Bridgewater, ac yn y lle diweddaf y cafodd gwrthddrych hyn o nodiadau ei alw a'i neillduo gyntaf i'r swydd ddiaconaidd. Symudodd y teulu i Ddyffryn LaCrosse tuag wyth mlynedd ar hugain yn ôl, pan oedd y wlad yn gydmarol newydd, y trigolion yn anaml, a'r eglwysi yn weiniaid.

Yr oedd Mr. Thomas wedi ei fendithio a chyfansoddiad corphorol gwydn, llawn o yni, a hollol rydd oddiwrth syrthni a diogi, a thrwy fod yn ddiwyd ac ymdrechgar, llwyddodd mewn ffordd gyfiawn a gonest i gasglu swm da o eiddo, ac yr oedd hyny wedi ei alluogi i ymryddhau oddiwrth lafur amaethyddol ers llawer o flynyddau, ac i ddyfod i fyw a gwneyd ei gartref mewn modd cysurus yn mhentref Bangor.

Collwyd priod a thad tyner a gofalus o'r teulu, aelod a swyddog ffyddlon o'r eglwys, a dyn cywir a gonest o'r ardal; ond y mae ein colled ni yn elw mawr ac yn enill an-nhraethadwy iddo ef. Yr Arglwydd, yn ei breswylfa sanctaidd, a fyddo yn farnwr ac yn arweinydd i'r weddw y rhan sydd yn ôl o daith yr anialwch, a bendithier y plant a chyfran helaeth o ysbryd eu tad, fel y byddont yn ffyddlon a llafurus yn nghwinllan yr Iesu.

Y Cyfaill o'r Hen Wlad ~ Chwefror 1885.