MRS. JANE WILLIAMS. WINFRED, SOUTH DAKOTA.
Ganwyd Mrs. Williams ger y Bala, Gogledd Cymru, yn y flwyddyn 1839. Pan oedd yn ddwy flwydd, oed ymfudodd i'r wlad hon gyda'i rhieni, y diweddar John Lloyd, Randolph, Wisconsin, a'i briod, gan ymsefydlu yn Collinsville, New York.Pan yn 23 mlwydd oed priododd gyda Wm. H. Williams, Penygraig, New York. Yn mhen ychydig flynyddau symudodd y teulu i Wisconsin, a buont yn ffarmio yn agos i Randolph, yna symudasant i ardal Foreston, Iowa, a thuag ugain mlynedd yn ol symudasant i South Dakota, ac ar ddydd Iau, y cyntaf o Chwefror, 1900, daeth y symudiad olaf. Ehedodd ei hysbryd at Dduw yr hwn a'i rhoes, ac ar y 3ydd o'r un mis hebryngwyd yr hyn oedd farwol o honi gan ei theulu a'i chyfeillion i fynwent Winfred, lle y cafodd gladdedigaeth barchus.
Cymerwyd rhan yn y gwasanaeth angladdol gan y Parchn. J. Alderson a Lepletak, a D. T. Davies, gweinidog y T. C. yn Winfred.
Bu yn fam i ddeg o blant, o ba rai y mae saith yn fyw, y rhai yn nghyd a'i phriod oeddynt gyda hi hyd y fynyd olaf. Yr oedd ein chwaer yn wraig ddarbodus, yn fam dyner a gofalus, yn ddichlynaidd, tawel a diymhongar yn yr eglwys, a gair da iddi gan ei chymydogion. Yr oedd yn amlwg ei bod yn pwyso yn ddiysgog ar y Gwaredwr. Y Sabboth diweddaf y bu byw dymunai ar ei phriod ganu iddi yr hen benill hwnw "O fryniau Caersalem ceir gweled." Credwn y gellid dweyd, am Mrs. Williams, "Gwyn fyd y meirw y rhai sydd yn marw yn yr Arglwydd." Yr Arglwydd fyddo yn nodded, ac yn gysur i'w hanwyl briod a'i phlant, ac a baro i'r amgylchiad chwerw hwn weithio er daioni iddynt hwy a'i holl berthynasau.
William W. Davies, Racine, Wisconsin.