ROBERT W. ROBERTS. POULTNEY, RUTLAND COUNTY, VERMONT.

Dydd Mercher, y 15fed, bu farw Robert W. Roberts ar ol dyoddef cystudd blin. Yr oedd wedi ei barlysu wyth mlyneld yn ol, fel nas gallai symud heb gynorthwy, ond yr oedd yn llawen a siriol bob amser hyd o fewn rhai wythnosau'n ol.

Ganwyd yr ymadawedig yn Cynwyd, ger Corwen, Meirionydd, Gogledd Cymru, Tachwedd 5ed, 1849, yn un o chwech o blant, pedwar wedi ei ragflaenu, a'r un sy'n aros yw Daniel W. Roberts, Granville, New York.

Daeth i'r wlad hon yn ieuanc, gan sefydlu yn South Poultney; yn mhen dwy flynedd ymunodd mewn glan briodas a Miss Ellen Morris, merch hynaf y diweddar Mr. a Mrs. Griffith Morris o'r un lle.

I hiraethu ar ol priod a thad gofalus a darbodus, gadawodd briod a saith o blant, y rhai sydd wedi tyfu i fyny yn anrhydedd i'w rhieni. Os bu efe yn gofalu am danynt hwy yn ffyddlon wrth eu magu, buont hwythau yn hynod felly iddo yntau yn ei gystudd maith a blin, sef G. W. Roberts, Howell, Thomas, Maurice, Laura, Blodwen ac Ifor; yr oll yn y lle hwn.

Yr oedd ein cyfaill yn hynod o fedrus mewn amryw alwedigaethau, yn neillduol felly yn y chwarel. Yr oedd yn gymydog caredig a gair da iddo gan bawb, fel gwr gonest, tawel a diymhongar. Rai blynyddau'n ol symudasant i'r lle hwn fel teulu, ac maent oll yn gaffaeliad mawr i'r achos goreu yn y lle. Yr oedd yr ymadawedig yn aelod ffyddlon a gweithgar o'r eglwys Gymreig, a bydd colled fawr ar ei ol.

Yr oedd yr angladd ddydd Sadwrn, y 18fed cyfisol. Gwasanaethwyd yn yr addoldy gan y gweinidog, y Parch. J. W. Morris a Dr. Dunton. y cor a'r dyrfa yn canu emynau o ddewisiad yr ymadawedig. Yr oedd llawer o blethdorchau a blodau prydferth yn gorchuddio cauad yr arch, wedi eu cyflwyno gan berthynasau a chyfeillion. Gwasanaethwyd ar lan y bedd yn mynwent Poultney gan Mr. Morris, a chanodd y cor "Bydd mvrdd o ryfeddodau." Heddwch i lwch ein hen gyfaill; bydd eu lle yn wag yn hir.
Ioan Eryri.

Y Drych ~ Mai 30ain, 1918.